کینیڈا نے 10 سال کے عرصے کے بعد پاکستان میں اپنا ویزا آفس دوبارہ کھولنے کا اعلان کیا ہے۔ کینیڈا نے پاکستان میں اپنا ویزا آفس بند کر دیا تھا اور اس وقت کی خراب سکیورٹی صورتحال کی وجہ سے اسے ابوظہبی منتقل کر دیا تھا۔
اطلاعات کے مطابق کینیڈین حکومت نے اسلام آباد میں اپنے ویزا آفس کی تعمیر کے لیے خاطر خواہ فنڈز مختص کیے ہیں۔ یہ پیشرفت پاکستان کی جانب سے کینیڈین ویزا درخواستوں کی بڑھتی ہوئی تعداد کے درمیان سامنے آئی ہے۔
پاکستان طویل عرصے سے کینیڈا پر زور دے رہا تھا کہ وہ اپنا ویزا سینٹر ابوظہبی منتقل کرنے کے فیصلے پر نظرثانی کرے کیونکہ کینیڈا میں لاکھوں پاکستانی مقیم ہیں اور ان کے رشتہ داروں کو کینیڈا کے ویزے کے حصول میں شدید مشکلات کا سامنا ہے۔
2019 میں کینیڈا میں پاکستان کے ہائی کمشنر نے بھی کینیڈا کی حکومت سے ویزا سینٹر کو واپس پاکستان منتقل کرنے کی درخواست کی تھی کیونکہ مختلف ممالک نے سیکیورٹی صورتحال میں بہتری کے بعد پاکستان میں ویزا سینٹرز دوبارہ کھول دیے تھے۔
تقریباً دس سال قبل کینیڈین حکومت نے سیکیورٹی کی خراب صورتحال کی وجہ سے پاکستان میں اپنا ویزا سینٹر بند کرنے کا فیصلہ کیا اور ابوظہبی اور برطانیہ (یوکے) میں دو مراکز کھولے۔
کینیڈا جانے کا ارادہ رکھنے والے پاکستانیوں کو اپنی ویزا درخواستوں پر کارروائی کے لیے پہلے یا تو ابوظہبی یا برطانیہ جانے پر مجبور کیا گیا۔ تاہم، سیکیورٹی کی صورتحال میں بہتری کے بعد، بہت سے ممالک نے پاکستان میں اپنے ویزہ مراکز دوبارہ شروع کر دیے، اور کینیڈا کو بھی اپنے فیصلے پر نظرثانی کرنے پر مجبور کیا۔
